ཡིག་གཟུགས་འདི་ནི་དུས་རབས་བརྒྱད་པར་བྱོན་པའི་ལོ་ཙཱ་བ་གྲགས་ཆེན་སྐ་བ་དཔལ་བརྩེགས་ལུགས་ཀྱི་རྫབ་ཆེན་དུ་གྲགས་པ་སྡེ་སྲིད་སངས་རྒྱས་རྒྱ་མཚོས་དུས་རབས་བཅུ་བདུན་པར་མཛད་པའི་《ཆ་ཚད་ཀྱི་བྲིས་དཔེ་དཔྱོད་ལྡན་ཡིད་གསོས》སུ་འཁོད་པ་གཞིར་བཟུང་སྟེ་གློག་ཀླད་རྩིས་འཕྲུལ་གྱི་ཡི་གེའི་གཟུགས་སུ་བཟོས་པ་ཡིན། 

ལོ་ངོ་འདི་དག་གི་རིང་ལ་ཁོ་བོས་སྔ་རྗེས་སུ་དེང་རབས་ཆ་འཕྲིན་ལག་རྩལ་ལ་གཞི་བཅོལ་ཏེ་བོད་ཀྱི་ཡིག་གཟུགས་བཅུ་གྲངས་ཤིག་བཟོས་ཤིང་རིན་མེད་དུ་སྤེལ་པ་ཡིན་ཞིང་། ད་རེས་སྐ་བ་དཔལ་བརྩེགས་ཀྱི་ལུགས་སུ་གྲགས་པའི་བྲིས་རྒྱུན་འདི་ཁོ་བོའི་ལག་ཏུ་སོན་པ་ནས་དེའི་མཛེས་ཉམས་ཀྱིས་ཡིད་ཀྱི་དང་བ་ཅིག་ཅར་དུ་དྲངས་ཤིང་ཁྱད་པར་དེང་གི་རིག་གཞུང་རྒྱུན་འཛིན་པ་རྣམས་ལ་ལེགས་སྐྱེས་གསར་པ་ཞིག་འབུལ་ཐུབ་ན་སྙམ་པའི་ཀུན་སློང་དང་བཅས་ངལ་བ་འཛེམས་མེད་ཀྱིས་མི་ལོ་ཧྲིལ་པོ་གཉིས་ཀྱི་ཡུན་དུ་བཟོས་ཤིང་། ད་ལྟ་བོད་ཀྱི་ཡིག་གཟུགས་དུས་ཆེན་གྱི་ཉིན་མོ་ཁྱད་པར་བ་འདིར་ཀུན་གྱི་གློག་ཀླད་དང་ཁ་པར་སོགས་སུ་སྤྱོད་བདེ་བར་བྱས་ཡོད། ཞར་དུ་ཐེངས་འདིར་ལྷག་བསམ་ཅན་ཀུན་བཟང་ཡེ་ཤེས་མཐའ་ཡས་ལགས་ཀྱིས་ཁོ་བོའི་ལས་ཀ་འདིར་བསྔགས་བརྗོད་དང་བཅས་མ་དངུལ་གྱི་མཐུན་རྐྱེན་གཞོགས་འདེགས་གནང་བ་ལ་སྙིང་ཐག་པ་ནས་ཐུགས་རྗེ་ཆེ་ཞུའོ།།

ཡིག་གཟུགས་ཀྱི་མིང་། ：ལོ་ཙྭ་བ་སྐ་བ་དཔལ་བརྩེགས་ལུགས་ཀྱི་རྫབ་ཆེན།
ཡིག་གཟུགས་བཟོ་མཁན། ：བྷོད་རྡོར་འཆང་།